કોઠી ફળિયામાં આવેલ શ્રી કૃષ્ણ મંદિર સૌ વૈષ્ણવોનું જાણીતું માનીતું ધાર્મિક સ્થળ છે. આ મંદિર આશરે ૨૦૦ વર્ષ પુરાણું માનવામાં આવે છે. તે સમયે વડોદરા કાછીયા પટેલ જ્ઞાતિમાં ૩ તડ (ત્રણ ભાગ) પડેલા કહેવાય છે. (૧) નાનું તડ (૨) મોટું તડ અને (૩) ખંભાતી તડ, કોઠી ફળિયાનું આ મંદિર તે સમયે ખંભાતી તડની માલિકીનું ગણાતું, તડ ફળિયામાં શ્રી રામજી મંદિર મોટા તડનું ગણાતું, હનુમાન ફળિયામાં શ્રી રામજી મંદિર નાના તડની માલિકીનું ગણાતું હતું. વર્ષો બાદ તડો એકત્ર કરી શ્રી વડોદરા કાછીયા પટેલ જ્ઞાતિ પંચ સમસ્તની સ્થાપના થઇ.

કોઠી ફળિયાનું આ મંદિર તે સમયે શ્રી ગંગા ભારતી મહારાજની મઢી તરીકે ઓળખાતું હતું. આ જુના પુરાણા મકાનમાં શ્રી ગંગા ભારતીના ગાદી સ્વરૂપે (શ્રીફળ)ની સ્થાપના હતી. તેની સાથે નાનું સિસમનું ઘુમ્મટવાળું સિંહાસન હતું. જેમાં શ્રી લાલજી ભગવાન (બાળ સ્વરૂપે) બિરાજતા હતા. ઉત્તરે ગણપતિ મહારાજ, દક્ષીણે હનુમાનજી મહારાજની સ્થાપિત મૂર્તિ હતી. વચ્ચે લાકડાના પાટ પર નાના સ્વરૂપોની સેવા હતી જેની આજે પણ મંદિરમાં સેવા પૂજા અર્ચના વિગેરે ધાર્મિક ક્રીયા ચાલુ જ રહેલી છે.

આ શ્રી ગંગા ભારતી મહારાજના જૂનામાં જુના પુજારી સ્વ. શ્રી નંદલાલ મનસુખરામ પંડ્યા હતા. જેવો ખંભાત તાલુકાના વટાદરા ગામ સાત વર્ષના હતા ત્યારથી છોડી વડોદરા તેમના મામાને ત્યાં રહેતા અને ગંગા ભારતી મહારાજનો પાટ પૂરતા, લગભગ નેવું વર્ષ આ મંદિરમાં સેવા કરી. ત્યારબાદ તેમના પુત્ર શ્રી સુરેશભાઈ નંદલાલ પંડ્યા જે હાલ પણ પુજારી તરીકેની સેવા કરી રહેલા છે.

કોઠી ફળિયામાં રહેતા સ્વ. શ્રી હીરાલાલ જેઠાલાલ કા.પટેલે ફળિયામાં રહેતા વૈષ્ણવો તેમજ જ્ઞાતિ મંડળમાંથી આર્થિક તેમજ બીજી સેવાઓ મેળવી આ મઢીનો (મકાન)નો જીર્ણોધાર કરી મંદિરના સ્વરૂપે સ્થાપના કરી.

ઈ.સ. ૧૯૭૯ જેઠ સુદી – ૫ ગુરુવાર તારીખ ૩૧-૫-૧૯૭૯ પુષ્ય નક્ષત્રમાં જ્ઞાતિના તેમજ સમગ્ર શરણાગત મંડળના સહકારથી સ્વ. શ્રી ગણપતભાઈ હરગોવિંદદાસ તેમજ તેમના ધર્મપત્ની શ્રીમતિ મહાલક્ષ્મીબહેનના શુભ હસ્તે સમગ્ર જ્ઞાતિના મોટા ઉત્સવ સ્વરૂપે શ્રી લક્ષ્મીશંકર શાસ્ત્રીજીની આજ્ઞા અનુસાર શ્રી બાળ કૃષ્ણ મોરલી મનોહર ભગવાનની ધાર્મિક વિધિથી પ્રાણ પ્રતિષ્ઠા કરી.

હાલ પણ શ્રી કૃષ્ણ મંદિરમાં જ્ઞાતિજનો તેમજ દર્શન માટે આવતા ભાઈ-બહેનો પોતાની મુશ્કેલી દુર કરવા શ્રી ગંગા ભારતી મહારાજની બાધા રાખે છે. અને તેઓના મનવાંછિત કાર્ય પુરા થાય છે. તેવી આસ્થા સાથે દરરોજ દર્શનાર્થે  પધારે છે.

પ્રાણ પ્રતિષ્ઠા દરમ્યાન બાકી રહેલી ધાર્મિક વિધિ પરમ પૂજ્ય શ્રી ૧૦૦૮ નારાયણ ગુરુજીએ આ મંદિરમાં પધારી શ્રી ગંગા ભારતી મહારાજની મંત્રોચાર દ્વારા પૂર્ણ કરી નવા (શ્રીફળ) દ્વારા તેને ગાદીમાં સ્થાપિત કાર્ય ત્યારથી મંદિરનો મહિમા વધી ગયો છે.

પૂજ્ય શ્રી માધવાચાર્ય સ્વામીજીની આજ્ઞા મુજબ ગોદામ્બા માતા (લક્ષ્મીજી – દક્ષીણ)ની સ્થાપના પણ કરવામાં આવી છે.

મંદિરમાં શ્રી મોરલી મનોહર ભગવાનની પ્રાણ પ્રતિષ્ઠા થઇ તે દિવસથી દરરોજ સવારે ૫.૩૦ (સાડા પાંચ વાગે) બધા વૈષ્ણવોની હાજરીમાં મંગળા આરતી થાય છે. બપોરે નિયમિત ભોગ ધરાવવામાં આવે છે. સાંજે ૭.૦૦ વાગે સંધ્યા આરતી થાય છે. વર્ષમાં આવતા 13 પુષ્ય નક્ષત્રમાં અભિષેકથી સેવા કરવામાં આવે છે તેમજ વિવિધ ઉત્સવ ઉજવવામાં આવે છે.